文頌男離世終年29歲 抗癌逾6個月受盡折磨 預先留低遺言
無綫29歲男主持人文頌男（Koba）上年12月宣布患癌，今日於社交平台發布預設帖文，「親自」宣布離世消息，令人感到惋惜。
Koba發出長文，指自己生前一個月左右情況已急轉直下，全文如下：
「好抱歉，喺呢度要同大家講一啲好沉重嘅事。當大家睇到呢一篇文章嘅時候，我已經離開咗人世。
呢幾個星期以嚟，我一直努力接受自己身體上嘅變化。呢段時間，我選擇咗唔對外透露自己嘅病情，亦冇同任何傳媒交代，因為我未有勇氣去接受呢啲變化。
其實，早喺2024年6月22號，我就因為下半身完全癱瘓、完全郁唔到、冇任何知覺而入院。呢個情況亦令我排唔到尿，所以當時要緊急送入醫院。
自從入院以嚟，到我撰文呢一刻（2024年7月10號），已經接近三個星期。唔好講病情冇好轉，反而越嚟越差。胸口以下仍然係完全冇知覺，完全控制唔到排泄功能，需要換尿片同埋插尿喉。癌細胞已經擴散去好多唔同嘅位置，例如胸、肺、多個脊椎、淋巴，甚至有啲腫瘤我可以喺外部摸到。有知覺嘅地方都感覺24小時都好痛，例如肩胛骨、頸椎、頭皮。
我仲有氣促，心跳長期偏快，依家要吸氧。每朝早都會有發燒嘅感覺，不過量體溫就量唔出發燒，而且仲會覺得好凍，但就出曬汗，身邊嘅人感覺我發緊熱。
醫院已經開咗好多唔同嘅藥畀我，不停調整劑量，雖然有抑制到大部分症狀，但仍然都係好辛苦、好唔舒服。
醫生同我商量過，再做康復治療都冇作用，只能夠做一啲舒緩性治療，見到有咩症狀就做相應治療抑制住佢，等我過得冇咁辛苦。簡單嚟講，依家就係等緊死，純粹希望死得舒服啲。
喺人生嘅最後一哩路，非常感謝親友同各界人士一直以嚟嘅支持同關心，呢段旅程有你哋陪伴，我感到無比幸運同感激。」
Koba好友陳栢昕post出同Koba兩手緊握相片，發文悼念：
「回想返一年前嘅七月，我哋仲係沖繩拍攝，一年後嘅今日我哋已經陰陽相隔…
對我而言，我拍YouTube最開心係可以遇到你。雖然我哋實際認識嘅日子只有三年左右，但已經成為彼此畢生摯友。好開心有好多人生嘅第一次都係同你一齊經歷，第一次攀岩、第一次浮潛、第一次出埠拍攝… 多謝你一直以嚟教識我咁多野、包容我嘅任性、接受我嘅小脾氣。有好多好多事情約定咗一齊去嘗試，亦有好多好多事情約定咗一齊去完成，好遺憾已經再冇機會了…
知道失去你我一定會好唔適應，將來返到公司亦唔知點樣面對。但請給我一點時間吧～ 我答應過你嘅事情我會努力做好，唔會辜負你嘅期望。願你去到另一個世界，沒有病痛折磨，可以開開心心…不負相遇，永遠愛你。」
「我們懷著無比沉痛的心情向大家宣佈，我們最愛的幕前成員文頌男（KOBA） 已於2024年7月13日下午離世，享年29歲。
文頌男的離世是我們團隊的一大損失，也讓無數喜愛他的粉絲感到深切哀痛。我們將永遠懷念他，感謝他在我們生命中留下的無數美好回憶和歡樂時光。
在這個難以承受的時刻，我們向他的家人和親友致以最深切的哀悼和支持。願他們在這段艱難的時光中找到安慰和力量。
我們將尊重文頌男的遺願，身後事宜一切從簡，不會安排任何公開的追思會或喪禮。我們亦懇請大家尊重其家人和親友的隱私，避免過度打擾。謝謝大家的理解與體諒。
我們的團隊將暫停更新一星期，以便商討後續發展計劃。對由此帶來的不便，我們深感抱歉，敬請原諒。」
有料爆? 歡迎報料！U Lifestyle WhatsApp 報料專線: 9610 1996
港生活人氣本地熱話
【樂迷注意🎧】《社群》請您免費聽歌三個月！
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
